Zaate Hermenie Beejein Gesjraveld
Zaate Herremenie Beejein Gesjraveld is de hofkapel van CV De Sjlaaibök.
Opriechting
Wie in 1955 c.v. De Sjlaaibök in Amie woorte opgeriech, voond de keersjveersje vereineging tot dao ouch meziek beej huurde. En dat zouw dan meziek móte zeen, dei neet allein beej karneval, meh veural ouch beej De Sjlaaibök huurde. Beej hermenie Sint Walburga woorte get luij um raod gevraog.
De vlam sjloog toen al gaw 'n groete voonk in de pan: d'r vörmde ziech 'ne groep van oongeveir 16 muzikante mèt 'n bezètting die mie es genoeg waor um karnevalsmeziek te sjpele. D'r woord echter al direk meziek van niveau gevraog. Ummersj, De Sjlaaibök hele eder jaor zittinge, ouch al in 1955. De oondertössje opgeriechde Hofkapel kraog es iersjte opdrach um die zittinge van begin tot eind op te luustere. Ze hele de sjtumming in de aovend mèt aangepasde sjlagers, mèh oondersteunde ouch de optreijende artieste van eige bojem. Klapsjtök van dat muzikaal optreije waor 't sjpele van de eige Amiese vastenaovendssjlager, dei tot veur kort eder jaor door de luij van Amie gekoze woord. In de karnevalsdaag zelf, van zaoterdagaovend tot aan asgoonsdag, inklusief 't oettrèkke van de Raod van Èlf beej ander sezoensgelegenhede, begeleijdde de Hofkapel 't Hoeglöstig Prinsepaar en de Raod. Dao waor 'n ederein zoe tevreije euver, tot vanaaf 1959 die taak zelfs woord oetgebreijd tot 't begeleije van de kinderzitting en 't jeugkarneval.
De bezètting
Jaorelangk bleef de bezètting van de Hofkapel naogenoeg 't zèlfde. Mèh in 1989 voonte versjeije ajd gedeende in de Hofkapel tot ze hun take mer 'ns móste doorgeve aan ander, jónger muzikante. Dao waore d'r oondertössje in de hermenie genoeg veur opgeleijd. In dat jaor kaom d'r dan ouch 'n groete verjónging in de Hofkapel. Waal bleve d'r nog 'n paar van de beginjaore, die nog eve hun ervaring wouwe doorgeve aan de jeug, mèh dat bleek al gaw neet mie nudig. Vanaaf dei tied sjpele d'r in de kapel weer muzikante mèt väöl loch in de lónge en sjteit d'r 'ne muzikale leijer veur dei neet gaw meug in zien erm weurt es heer 'n oor aan ein sjtök de maot sjteit te houwe. Beej dat alles woord en weurt gein oondersjeid gemaak tössje man en vrouw: alletwie zien in aantal en kwaliteit everedig vertegewoordig. Nao 'n paar jaor voonte de kapellede tot de muzikale bezètting oetgebreijd moch weure. Nuije meziek eis ummersj ouch miejer instreminte, andere ammezuur, oetgebreijder bloos- en sjlaagwerrèk. D'r woord driftig in de buurt roondgekeke nao wie dat 't bèste opgelos kós weure. Beej de plaatseleke korfbalclub leep 'n gelegenheidshermenieke roond, dat al 'n paar jaor zien sjpore op karnevalsmaondag aan 't verdene waor.
Kontakte woorte gaw gelag en de Hofkapel woord oetgebreijd mèt 'n aantal muzikante, boevan sómmige al zier verdeenstelek sjpeilde en andere hun noete nog regelmaotig mèt kuns- en vleegwerk beejein móste sjravele. Es kapel "Beejeingesjraveld" woord vanaaf dat jaor regelmaotig opgetroje, mèt name beej bovegenumde karnevalsaktiviteite van De Sjlaaibök, mèh ouch op karnevalsdinsdag op 't Zaate hermeniekeskonkoer in Mestreech. Veur de begeleijing beej de zittinge is die bezètting aan de nogal te groete kant. Op ander gelegenhede laote veer ós es Hofkapel Beejein Gesjraveld boetegewoen binne en boete hure. Dat is de groep blieve doen tot circa 2015.